(ئاكانیوز) ـ كەمێك بەر لە ئێستە سەرچاوەیەك لە یاریگەى شەعب لە بەغدا راى گەیاند، هەرچەندە دۆخى تەناهیی یاریگەكە بەكۆمپانیایەكی تەناهی سپێردراوە، بەڵام لەبەرچاوى ئەوان سووكایەتی بەهاندەرانى یانەى هەولێر دەكرێ و هەندێكیان داركاریش كراون.

نێردەى ئاژانسی كوردستان بۆ دەنگوباس (ئاكانیوز)ی لە ناو یاریگەى شەعب كە بڕیارە ئەمڕۆ سەعات 21:00 مێوانداری یاریی نێوان هەولێر و زەوڕا بكات، راى گەیاند، هاندەرانى هەولێر لەناو ئەو یاریگەیە كە ژمارەیان نێزیكەى 300 هاندەر دەبن، سەرەڕاى پێدانى ئەركی پاراستنى دۆخى تەناهیی یاریگەكە بەكۆمپانیایەكی تەناهی، رووبەڕووی لێدان و سوكایەتیكردن بوونەتەوە.

پتر گوتى، هاندەرانى هەولێر لە دۆخێكی خراپ دان و رووبەڕووى سوكایەتیكردن دەبنەوە لەلایەن هاندەرانى یانەى زەورا و هێرشیان دەكرێتە سەر و ئاڵای یانەى هەولێریان لێ دەسێنرێ.

لەلایەكی تریشەوە، جەرجیس سادق سەرۆكى دەستەى هاندەرانى یانەى هەولێر بە(ئاكانیوز)ى راگەیاند، هاندەرانى هەولێر لەو پەڕی دۆخی خراپدان و تەنانەت لەلایەن پیاوانى تەناهی ئەو كۆمپانیایەوە هێرشیان كراوتە سەر و هەندێكیان داركاری و تووشی لێدان هاتوون.

بڕیارە ئەمڕۆ لە یاریی كۆتایی پاڵەوانیەتی خولی بژاردەى عێراق هەردوو یانەى هەولێر و زەورا لە یاریگەى شەعب لە بەغدا بەیەك بگەن. یاریگا