1

بابه‌ت: ئیلاهى.......

ئیلاهى! نیازم نەوازشتە


ئیلاهى! ئەى حەبیبە تەنیاكەى دڵ و ئەى ئەنیس و هەمدەمى دڵەى تینوو! بەم زمانى نزایە و بە دڵێكى پرِ لەتكاوە، حەبیبانە و دەردەدارانە دێمە دیوانى پرِ لە"ودّ"و مەحەببەتت و هاناى نیازمەندیم دێنمە دیوانى بە ئەمانت ..

مەعبودا! خواست و نیازى من: ناز و نەوازشى تۆى بىَ نیازى نیازكێش و كەریمى میهرەبانە.
پەروەردگارا! زمانى تەژنە و دڵەى تینووم...رِۆحى ئاورا و گیانى برسیم، بەم ئێوارە و غروبە نوورینە داواى قومێك ئاوى زەمزەم و كوپێك ئاوى كانى كەوسەر و پیاڵە و پەرداخێك ئاوى رِووبارى رِەییانت لێدەكات.

خوایەگیان! رِۆحى ئاورا و گیانى برسیم داواى نانى رِەزا و خۆراكى لیقا و ژوانت دەكات.

ئەى مەحبوبى صائیمین و وەى ئەنیسى قائیمین! هاتووم و دێم بەزمانى تینوو و گەدەى برسى و بە دونیایەك لەخواترسى و بە تۆزقاڵك خواپەرستى و بەزەرِرِەیەك لەخوادۆستى، هاتووم تەقە ئەدەم لەدەرگانەى میهر و مەحەببەت و مەغفیرەت و كەرەمت و داواى یەكەمم: بەخشش و، تكاى دووەمم: بەزەیى و، هاناى سێیەمم: رِەزامەندى و قبوڵى و، نزاى ئەخیرم: قوم و چكەیەك لە بارانى میهر و مەحەببەت و عیشق و ئەوینت ببارێنە بەسەر مەزراى وشكەوەبووى رِۆحى تەژنە و زەوى كرِێن و كرِە دێمى دڵەى تینوومدا .

یارِەب: تۆ زۆر لەوە گەورەتر و شایەنترى كە بەچەند رِۆژ و كاتژمێرێك برسیەتى و تینوویەتى و خۆگرتنەوە، بتوانین حەقى تاكە نیعمەت و بەخشش و خەڵاتێكت بدەین . ئیلاهى! ئێمە هەرچى و هەرچەند بەندەگیت بكەین هەركەم و نالایقە، بەڵام وەك چۆن رِوناكى رِۆژ نیشانەى بوونى تیشكى خۆرە، نەك خودى خۆر، ئەوا ئەم كەمە بەندایەتیەی ئێمەش نیشانەی ئەوەیە كە دەمانەوێت بەندایەتیت بكەین و ملكەچت بین, نەك ئەمە هەموو ئەوە بێت كە شایستەی مەقامی باڵای خوایەتی تۆبێت و یا خود هەر ئەوەندەمان بوێت .

مەعبودا! كەریما! حەبیبا! هاتوینەتە دیوانت بە زمانی نزا، بەكوَڵێك دوعا و دەریایەك خەتا، یا رِەب! ئێمە بە كوَڵێك كڵوَڵی و، دونیایەك شەرمەندەگی و، خەرمانێك گوناه و قێور لە بەندەگی، وا دێینە دیوانت و نمە و وەشتی دوعا و نزا دەبارێنین و رِوی خەجڵەت و شەرمەندەیی لە دیوانت دەنێین, دەتوَش ئەی میهرەبان! ببارێنە بارانی رِەحمەتی ناز و نەوازشت بەسەر بەندەی تینوویی ناز و برسی نەوازش و ناز كێشانتدا.

خوایە گیان! ئەی شیرینتر لە گیان! شیرینی خورمای بەربانگی ئێواران شیرینی لیقا و دیدارت دێنێتە پێش چاو و دیەی دڵمان, قومە ئاوی بەربانگی ئێواران سافی و زوڵاڵی و سازگاری میهر و بەزەییت دەخاتەوە یادمان و دەرگای رِەیان بە كراوەیی دێتە پێش چاومان، سفرەی سەحەر و خوانی پارشێوان ژوان و دیداری رِەسول و یاران و غەریبانی هەڵگری پەیامەكەت دەهێنێتەوە یادمان .

دەسا ئەی مهرەبان و بەخشندەی خاوەن عەتا! هەموو ئەو خەڵات و جوانی و شیرینییانەمان پىَ ببەخشە و بەشدارمان بكە لەو چێژ و خوَشییانەى كە هەموویان بەخشش و خەڵاتی توَی بەخشندەی كەریم و میهرەبانن .

دواجار خوایە گیان بەدڵ و بە كوڵ دەڵێم :

قەبوڵ بكە نزای شەرمەندەگیم

سپیكە رِووی سیای بەندەگیم

پرِ خێر و بێرى كەی هەموو زیندەگیم

تا لە بیری كەم تینوویەتی و خەستەگیم .